MAENDELEO YA UCHUMI JUMLA | UENDELEZAJI WA SEKTA BINAFSI | SUALA MAALUMU KATIKA MAENDELEO |
MAENDELEO KATIKA SEKTA MBALIMBALI

Kilimo
Maliasili na Utalii
Madini
Viwanda na Biashara
Ujenzi wa Maendeleo ya Ardhi
Mawasiliano na Uchukuzi
Nishati
Maji
Elimu na Mafunzo
Afya
Maendeleo ya Jamii

229. Mwaka 2003, sekta ya ujenzi ilikua kwa kiwango sawa na cha mwaka 2002 cha asilimia 11. Ukuaji huu wa wastani umeendelea kuchangiwa na kuwepo kwa shughuli za ujenzi wa majengo yasiyo ya kuishi, ujenzi wa barabara, uendelezaji wa ardhi ukijumuisha ujenzi wa nyumba za kuishi. Aidha, mchango wa sekta hii katika Pato la Taifa halisi ulikuwa asilimia 5.2 ikilinganishwa na asilimia 5.0 mwaka 2002.

230. Mwaka 2003, matengenezo ya kawaida ya barabara kuu kilometa 5,644 na madaraja 727 yalikamilishwa ikilinganishwa na kilometa 5,057 na madaraja 320 yaliyokamilishwa mwaka 2002. Kilometa 6,587 na madaraja 907 ya barabara za mikoa zilifanyiwa matengenezo mwaka 2003 ikilinganishwa na kilometa 3,780 na madaraja 180 mwaka 2002. Aidha, mwaka 2003 daraja kubwa la mto Rufiji (Daraja la Mkapa) linalilounganisha mikoa ya Dar es Salaam na ile ya Kusini mwa Tanzania lilikamilika.

231. Mafanikio katika sekta hii mwaka 2003 yametokana na utekelezaji wa mikakati na sera ya ujenzi, inayoweka mkazo katika ushirikishwaji wa sekta binafsi. Aidha, kazi za ujenzi na matengenezo ya barabara nchini zimeendelea kutekelezwa kwa ufanisi hasa kutokana na kuwepo kwa fedha za mfuko wa barabara na taratibu nzuri za udhibiti wa makandarasi na washauri waelekezi. Kwa ujumla, sera ya ujenzi mwaka 2003 imetoa hamasa kubwa kwa wadau wa sekta hii.

Mtandao wa barabara
232. Mwaka 2003, hali ya mtandao wa barabara kuu na zile za mikoa ni kama inavyoonyeshwa kwenye Jedwali Na. 15.1 hapa chini. Jumla ya kilometa 3,647 za barabara kuu zimekuwa na hali nzuri mwaka 2003 ikilinganishwa na kilometa 3,300 mwaka 2002, sawa na ongezeko la asilimia 10.5. Kwa upande wa barabara za mikoa, jumla ya kilometa 5,483 mwaka 2003 zilikuwa na hali nzuri ikilinganishwa na kilometa 3,725 mwaka 2002, sawa na ongezeko la asilimia 47.2. Aidha, mwaka 2003, jumla ya kilometa 3,717 za barabara kuu zilikuwa na hali ya wastani ikilinganishwa na kilometa 3,900 mwaka 2002, sawa na upungufu wa asilimia 4.7. Kuhusu barabara za mikoa, jumla ya kilometa 6,790 mwaka 2003 zimekuwa na hali ya wastani ikilinganishwa na kilometa 7,475 mwaka 2002, sawa na upungufu wa asilimia 9.2. Kwa upande wa barabara zilizokuwa na hali mbaya, jumla ya kilometa 2,670 za barabara kuu mwaka 2003 zilionekana kuwa na hali mbaya ikilinganishwa na kilometa 2,845 mwaka 2002, sawa upungufu wa asilimia 6.2. Pia, mwaka 2003, jumla ya kilometa 6,093 za barabara za mikoa zilikuwa na hali mbaya ikilinganishwa na kilometa 7,265 mwaka 2002, sawa na upungufu wa asilimia 16.1

233. Kwa kutambua umuhimu wa umakini katika sekta ya ujenzi mwaka 2003, Bodi inayoshughulikia usajili wa makandarasi ilisajili makandarasi 654 ikilinganishwa na makandarasi 717 mwaka 2002, sawa na upungufu wa asilimia 13. Kwa ujumla, makandarasi 2,911 mwaka 2003 walisajiliwa ikilinganishwa na makandarasi 2,565 mwaka 2002, sawa na ongezeko la asilimia 13. Pamoja na usajili wa makandarasi mwaka 2003, tafiti zilizofanywa zimebainisha kwamba makandarasi wengi wazalendo wako kwenye madaraja madogo madogo. Idadi yao ni zaidi ya asilimia 70 na hawawezi kufanyakazi zenye thamani ya zaidi ya shilingi 50 milioni. Kwa upande wa ujenzi wa barabara, karibu asilimia 90 ya makandarasi wazalendo imebainika kwamba hawawezi kufanya kazi yenye thamani ya shilingi 300 milioni, kiwango ambacho ni wastani wa kujenga kilometa moja ya barabara ya lami.

Uratibu wa Kazi za Makandarasi
234. Katika kutekeleza kazi zake za udhibiti wa sekta, Bodi ya usajili wa Makandarasi ilikagua jumla ya miradi ya ujenzi 675 ikilinganishwa na miradi 308 iliyokaguliwa mwaka 2002, sawa na ongezeko la asilimia 119.2. Ongezeko kubwa hilo limetokana na kuwepo kwa miradi mingi ya ujenzi nchini. Kwa ujumla, zaidi ya asilimia 50 ya miradi ya ujenzi iliyokaguliwa imeonyesha kwamba makandarasi wengi wanafuata taratibu za ujenzi. Aidha, katika zoezi hilo la ukaguzi wa miradi mwaka 2003, Bodi ya Usajili wa Makandarasi iliwafutia usajili makandarasi 120 ikilinganishwa na makandarasi 115 mwaka 2002. Jumla ya makandarasi 1,435 walifutiwa usajili wao tangu mwaka 1998.