MAENDELEO YA UCHUMI JUMLA | UENDELEZAJI WA SEKTA BINAFSI | SUALA MAALUMU KATIKA MAENDELEO |
MAENDELEO KATIKA SEKTA MBALIMBALI

Uendelezaji wa Sekta Binafsi
Masuala Maalum Yanayohusu Sekta Zote
Maendeleo ya Juhudi za Kupambana na Umasikini

157. Katika mwaka 2003, serikali iliendelea na juhudi za kupambana na umaskini nchini kwa kushirikiana na wadau mbalimbali wa ndani na nje ya nchi. Wiki ya Umaskini iliyofanyika Oktoba mwaka 2003 ilitoa fursa kwa wadau kuweza kujadili kwa kina utekelezaji wa Mkakati wa Kupunguza Umaskini nchini na hatua zilizofikiwa. Aidha, katika Wiki ya Umaskini ulifanyika uzinduzi wa kufanya mapitio Mkakati wa Kupunguza Umaskini. Hii inatokana na serikali kujiwekea malengo ya kila baada ya miaka mitatu kupitia upya Mkakati huu. Taarifa ya utekelezaji wa Mkakati ya mwaka 2002/03 ilihitimisha awamu ya kwanza ya miaka mitatu.

Mapitio ya Mkakati wa Kupunguza Umaskini
158. Utekelezaji wa Mkakati wa Kupunguza Umaskini nchini ulifikia katika mwaka wa tatu na wa mwisho katika awamu ya kwanza ya utekelezaji wake. Kulikuwepo na mafanikio katika utekelezaji wa Mkakati wa kwanza nchini hasa katika sekta zilizopewa kipaumbele, hususan elimu, afya, barabara vijijini, na maji. Pia, kulikuwepo na mafanikio katika maeneo ya masuala ya uchumi jumla na katika mageuzi kwenye sekta mbalimbali zikijumuisha sekta za fedha, utumishi wa umma na serikali za mitaa. Majadiliano kuhusu mapitio ya Mkakati wa Kupunguza Umaskini yalianza katika ngazi za wadau mbalimbali ikijumuisha serikali, mashirika yasio ya kiserikali, vikundi vya hiari, asasi za dini na binafsi. Madhumuni ya kufanya mapitio ya Mkakati huu ni kubaini mafanikio katika utekelezaji; matatizo yaliyojitokeza; na mapungufu yanayoweza kuwepo kwa lengo la kuuboresha na kuharakisha utekelezaji wa awamu ijayo ya Mkakati. Katika kufanya mapitio ya Mkakati, mkazo umewekwa katika kupanua zaidi ushirikishwaji na umiliki wa mchakato.

Ufuatiliaji na Tathmini ya Umaskini
159. Mfumo wa Kufuatilia umaskini nchini uliendelea kama ulivyobainishwa katika Mpango Kamambe wa Ufuatiliaji kupitia vikundi vya Sensa na Uchunguzi; Utafiti na Uchambuzi; Takwimu za Kiutawala; na Usambazaji Taarifa, Uhamasishaji na Uelimishaji. Mafanikio ya mfumo huu katika mwaka 2003 ni pamoja na kuchapisha Taarifa ya Umaskini na Maendeleo ya Watu ya mwaka 2003, Taarifa ya Utekelezaji wa Mkakati wa Kupunguza Umaskini ya mwaka 2002/03; Usambazaji wa matokeo ya Tafiti ya Mapato na Matumizi ya Kaya-2000/01 na matokeo ya jumla ya Sensa ya Watu na Makazi 2003; na kufanyika kwa Wiki ya Umaskini nchini mwezi Oktoba 2003. Aidha, mfumo huu umewezesha kufanyika kwa utafiti shirikishi wa kutathimini umaskini nchini uliokusanya maoni ya wananchi katika sehemu na hali ya maisha mbalimbali ya jamii kuhusu masuala ya umaskini. Pia, warsha mbalimbali za kikanda zilifanyika kwa ajili ya kupata takwimu za kiutawala.

Hali ya Utekelezaji wa Mkakati wa Kupunguza Umaskini Katika Sekta za Kipaumbele
160. Katika mwaka 2002/03, serikali iliendelea kuelekeza sehemu kubwa ya rasilimali kwenye sekta zilizobainishwa katika kupunguza umaskini kwa lengo la kukuza maendeleo ya rasilimali watu; utoaji wa huduma za msingi za kijamii; kuimarisha miundombinu ya kiuchumi na kuongeza uzalishaji katika kilimo na kuhakikisha upatikanaji wa chakula.

Maendeleo ya Rasilimali Watu
161. Katika mwaka 2002/03, serikali kwa kushirikiana na wadau mbalimbali iliendelea kutekeleza Mpango wa Maendeleo ya Elimu ya Msingi uliokuwa na malengo ya kupanua uandikishwaji wa watoto ; kuongeza ubora wa elimu ; kujenga uwezo ; kuboresha na kuimarisha utawala na mpangilio wa kiasasi. Mafanikio katika mwaka 2003 yanaoneshwa katika jedwali lifuatalo. Katika mwaka 2002/03, serikali ikishirikiana na wadau wengine wa sekta hii iliandaa awamu ya pili ya Mkakati wa Sekta ya Afya unaolenga kutekeleza malengo muhimu ya Mkakati wa Kupunguza Umaskini. Aidha, serikali katika uendelezaji wa sekta ilianzisha mkakati wa Kitaifa wa kupambana na UKIMWI; kufanya marekebisho katika Sera ya Afya ya mwaka 1990; na kuongeza chanjo za surua hadi kufikia asilimia 89. Katika mwaka 2002/03, usambazaji wa maji vijijini uliongezeka kutoka asilimia 52.8 mwaka 2002 hadi asilimia 53.5 mwaka 2003. Aidha, katika kipindi hicho upatikanaji maji sehemu za mijini ulibakia asilimia 73 kama ilivyokuwa mwaka 2002 wakati ambapo huduma ya maji taka iliongezeka kwa asilimia 10 mwaka 2002 hadi asilimia 17 Juni 2003.