PRESS SECRETARY TO THE PRESIDENT OF THE

PRESS SECRETARY TO THE PRESIDENT OF THE

UNITED REPUBLIC OF TANZANIA

The State House,

Tel: 255-22-2116539/2116913 P.O. Box 9120 ,

Fax. No. 255-22 2113425 DAR ES SALAAM.

TAARIFA KWA VYOMBO VYA HABARI

Rais Jakaya Kikwete amesema maendeleo ya sayansi na teknolojia ndiyo mambo yanayozitofautisha nchi zilizoendelea na zinazoendelea. Na kwa sababu hiyo amesema anaunga mkono shule ambazo zinazitilia mkazo ufundishaji wa masomo ya sayansi.

Ameyasema hayo leo mara baada ya kufungua shule ya sekondari ya wasichana ya Kandoto inayofundisha masomo ya sayansi na kauli mbiu yake ni sayansi kwa maendeleo endelevu. Shule hiyo yenye kidato cha kwanza hadi cha sita inamilikiwa na Kanisa Katoliki Jimbo la Same.

“ Baba Askofu Koda umenifurahisha sana, umenifurahisha kwa mambo mawili, moja ni hili la upendeleo wa elimu kwa mtoto wa kike, na pili ni hili la kutilia mkazo masomo ya sayansi, yote haya mawili mimi nayaunga mkono” akasema Kikwete.

Akisisitiza kuhusu umuhimu ya sayansi na teknolojia katika maendeleo ya nchi, Rais amewaeleza wananchi waliohudhuria ufunguzi wa shule hiyo, kwamba hakuna maendeleo bila sayansi na teknolojia na kwamba kama Tanzania inataka kuendelea lazima itilie mkazo eneo hilo .

“Ramli haziwezi kutuletea maendeleo, sayansi ndiyo itatuletea maendeleo na tofauti zilizopo kati ya nchi zilizoendelea na zinazoendelea ni maendeleo ya sayansi. Sayansi ni elimu ya utambuzi wa kanuni zinazotawala maumbile na mazingira na hivyo kutengeneza zana na vifaa ambazo ndiyo teknolojia ya kuleta maendeleo” akafafanua.

Akizungumza upendeleo wa elimu kwa mtoto wa kike, Rais amesema mtoto wa kike lazima apate fursa ya kupata elimu, kwa kuwa kwa miaka mingi jamii imekuwa haitoi kipaumbele kwa mtoto wa kike.

Aidha ameainisha kwamba katika utoaji wa fursa ya elimu kwa mtoto wa kike, ni vema pia akapata fursa ya kujifunza masomo ya sayansi, kama ambavyo Kanisa Katoliki Jimbo la Same lilivyofanya.

Amelipongeza Kanisa Katoliki nchini kwa kuwa na heshima ya kutoa mchango mkubwa sana wa elimu hapa nchini, na kuwanufaisha Watanzania wengi.

Amesema serikali itendelea kuyaunga mkono mashirika ya dini na taasisi nyingine ambazo zinachangia juhudi za serikali katika kuendeleza sekta ya elimu hapa nchini.

Akitoa maelezo mafupi ya Shule hiyo y ya Sekondari ya Kandoto, Askofu wa Jimbo la Same, Mhashamu Koda amemweleza Rais kwamba kanisa hilo limeamua kutoa kipaumbele cha elimu kwa mtoto wa kike, lakini na kutilia mkazo masomo ya sayansi kwa kuwa kanisa linatambua hakuna maendeleo bila elimu.

Askofu huyo amesema Kanisa Katoliki halitaacha kutekeleza wajibu wake wa kujenga na kuendesha shule za sekondari, msingi, ufundi na shule za awali zitakazotoa elimu yenye ubora wa hali ya juu kabisa.

Akasema “Mhe. Rais, Kanisa Katoliki litaendelea na kazi yake ya kutilia mkazo elimu, kanisa litaendelea kutilia mkazo ubora wa elimu na ubora wa mazingira ya kusomea. Hata kama wenzetu wote watatilia mkazo ujenzi wa miradi yenye faida kubwa, sisi Kanisa Katoliki tutaendelea kukazania elimu.

Shule hiyo ya Sekondari ya Kandoto yenye kidato cha kwanza hadi cha sita ilianza kujengwa miaka miwili iliyopita na jiwe lake la msingi liliwekwa na Rais Kikwete wakati huo akiwa Waziri wa Mambo ya Nje na mgombea urais wa Jamhuri ya Muungano wa Tanzania

Shule hiyo ambayo imekamilisha ujenzi wa vyumba vya kisasa vya madarasa 18, ofisi za walimu 12, na majengo mengine imegharimu shilingi milioni 420 na bado inaendelea kujengwa.

Pamoja na kufungua shule hiyo ya Kandoto Rais pia alifungua shule nyingine ya kisasa ya awali na msingi anayomilikiwa na masista wa Kanisa Katoliki kutoka Italia na imegharimu shilingi milioni 374.

Katika siku yake ya ziara yake ya siku saba mkoani Kilimanjaro, Rais Kikwete pia alifungua shule nyingine ya sekondari ya Alikachenje iliyoko katika kijiji cha Makanya inayomilikiwa na kuendeshwa na Profesa Mlacha.

Shule hiyo ya Alikachanje itakuwa na uwezo wa kuchukua wanafunzi 1000 na tayari imeanza na wanafunzi 20 wa kidato cha kwanza na 20 wa sekondari.

Rais amempongeza Profesa Mlacha kwa kujenga shule inayoendana na karne ya 21 ikiwa na mazingira mazuri ya kusomea, majengo ya kutosha na mazuri, maktaba zenye vitabu va kutosha na maabara.

Rais pia amekagua mradi wa kilimo cha umwagiliaji wa Ndugu. Rais pia amewaeleza wananchi waliojitokeza kwa wingi kusalimiana naye katika vijiji mbalimbali kwamba serikali imeanza kazi ya utekelezaji wa ahadi alizoahidi wakati wa kampeni katika wilaya hiyo ya Same.

Baadhi ya ahadi hizo ni ujenzi wa barabara ya lami katika maeneo mbalimbali na tatizo sugu la maji kwa wilaya hiyo na vitongoji vyake. Ametumia fursa hii kuwashukuru wananchi wa wilaya ya Same kwa kumpigia kura na kuichagua CCM.

Mwisho.

M. Mwingira

Same, Kilimanjaro.

3 Agosti, 2007