PRESS SECRETARY TO THE PRESIDENT

Fax. No. 255-22 2113425 The State House,

Tel: 255-22-2116539/2116913 P.O. Box 9120,

DAR ES SALAAM.

E-mail: press@ikulu.go.tz

TAARIFA KWA VYOMBO VYA HABARI

JUMUIYA YA AFRIKA MASHARIKI SASA KUWA NA MAHAKAMA YA RUFAA

Na Maura Mwingira

Nairobi, Kenya

15/12/2006

Jumuia ya Afrika ya Mashariki sasa itakuwa na Mahakama ya Rufaa, kufuatia viongozi wa Jumuia hiyo hapo jana (Alhamisi) kutia saini na kuridhia marekebisho katika Katiba ya Jumuia hiyo.

Marais Jakaya Kikwete, Mwai Kibaki na Yoweri Museveni walisaini marekebisho ya katiba hiyo wakati wa kikao kidogo (mini summit) cha viongozi hao kilichofanyika katika ukumbi wa mikutano wa jengo la Umoja wa Mataifa, hapa Nairobi Kenya.

Viongozi hao walikuwa jijini Nairobi kuhudhuria mkutano wa pili wa kimataifa kuhusu Maziwa Makuu.

Pamoja na kuridhia kuundwa kwa Mahakama ya Rufaa, viongozi hao pia wametia saini marekebisho ya katiba hiyo ya EAC ambapo sasa kutakuwa na kipengele kitakachowapa mamlaka viongozi wa jumuia hiyo kuwachakulia hatua za kidhamu majaji wa mahakama za Jumuia hiyo.

Marekebisho ya katiba ya Jumuia ya Afrika Mashariki, kunafuatia maagizo yaliyotolewa na viongozi hao kupitia tamko lao la pamoja lililotolewa mara baada ya mkutano wa nane wa kilele wa EAC uliofanyika Arusha, Tanzania Novemba 30 mwaka huu.

Novemba 27, siku mbili kabla ya kufanyika kwa mkutano wa kilele majaji wa mahakama ya EAC walitoa hukumu kupinga uteuzi wa wabunge kutoka nchi Kenya kwa kuwatamka si wabunge waliochaguliwa kihalali.

Uamuzi huo ulileta sitofahamu na kusababisha wabunge wa Bunge la Afrika Mashariki kutoapishwa hadi sasa.

Utiaji saini wa mabadiliko ya katiba ya EAC ulishuhudiwa pia na Mawaziri wa Mambo ya Nje wa Tanzania, Kenya, Uganda na Katibu Mkuu wa Jumuia ya Afrika Mashariki Juma Mwapachu na baadhi ya maafisa wachache kutoka EAC.

Mwisho