UNITED REPUBLIC OF TANZANIA

DIRECTORATE OF PRESIDENTIAL COMMUNICATIONS

Telephone: 255-22-2114512, 2116539 E-mail: press@ikulu.go.tz Website: www.mawasilianoikulu.go.tz Fax: 255-22-2113425

PRESIDENT’S OFFICE, THE STATE HOUSE, P.O. BOX 9120, DAR ES SALAAM. Tanzania.

TAARIFA KWA VYOMBO VYA HABARI

SALAMU ZA POLE ZA RAIS WA JAMHURI YA MUUNGAO WA TANZANIA, MHESHIMIWA DKT. JAKAYA MRISHO KIKWETE

Rais wa Jamhuri ya Muungano wa Tanzania, Mheshimiwa Dkt. Jakaya Mrisho Kikwete ametuma salamu za pole kwa watu walioathiriwa na mafuriko mkoani Morogoro kwa kukosa mahali pa kuishi baada ya nyumba zaidi ya 200 kuharibiwa vibaya na mafuriko hayo kufuatia mvua kubwa zilizonyesha katika Milima ya udzungwa na Mahenge kati ya tarehe 19 na 25 Aprili, 2011.

Katika salamu zake hizo za pole kupitia kwa Mkuu wa Mkoa wa Morogoro, Luteni Kanali Mstaafu, Mheshimiwa Issa Machibya, Rais Kikwete ameelezea kusikitishwa kwake na madhara makubwa waliyoyapata watu hao hususan wa maeneo ya Mbingu na Ifakara kutokana na mafuriko hayo ambayo pia yameharibu kwa kiasi kikubwa miundombinu na kuathiri zaidi ya ekari 600 za mazao hususan zao la mpunga ambalo ni tegemeo lao kubwa kwa chakula na biashara.

Rais Kikwete amesema Serikali yake inafanya kila linalowezekana kuhakikisha kwamba wananchi wote walioathiriwa na mafuriko hayo wanapatiwa misaada stahiki ya hali na mali ili kuwawezesha kurejea katika maisha yao kama ilivyokuwa kabla ya kutokea kwa mafuriko hayo. Wakati huo huo, Rais Kikwete amepongeza hatua za awali na za haraka zilizochukuliwa na uongozi wa Mkoa wa Morogoro kunusuru maisha ya wananchi walioathiriwa na mafuriko hayo, huku akihimiza mamlaka zinazohusika na udhibiti wa maafa na wadau wengine kushirikiana kwa karibu na uongozi wa Mkoa huo kunusuru maisha ya wananchi hao na kuangalia namna ya kuepukana na hali hiyo kwa siku za usoni.

Mwisho.

Imetolewa na:

Kurugenzi ya Mawasiliano ya Rais,

Ikulu,

DAR ES SALAAM.

27 Aprili, 2011