Tanzania huadhimisha Siku ya Kuwakumbuka Mashujaa waliopoteza maisha yao wakiutetea, kuupigania na kuulinda uhuru wa Tanzania kila ifikapo Julai 25 ya kila mwaka. Siku hii ya kuwakumbuka mashujaa huambatana na shughuli mbalimbali zikiwemo dua na sala maalum ya kuwaombea mashujaa waliopoteza maisha na kuiombea amani nchi kutoka kwa viongozi wa madhehebu ya dini, gwaride maalum la vikosi vya majeshi ya Ulinzi na Usalama.
Shughuli nyingine ni uwekaji wa silaha za jadi ngao na mkuki na uwekaji wa maua zoezi ambalo hufanywa na Amiri Jeshi Mkuu na Rais wa Jamhuri ya Muungano wa Tanzania pia viongozi wengine walioteuliwa wakiwemo viongozi wa wazee, mabalozi, mkuu wa Majeshi na Mameya. Pia Siku ya Mashujaa huambatana na viongozi wakuu wa nchi kutembela maeneo ya kumbukumbu ya historia na makaburi walimozikwa mashujaa na wapigania uhuru wa Tanzania pamoja na ujumbe wa kuwahakikishia watanzania amani na Utulivu na usalama wa mipaka ya Jamhuri ya Muungano wa Tanzania kutoka kwa Rais na Amiri Jeshi Mkuu.
