Tovuti Kuu ya Serikali

Wizara ya Katiba na Sheria ni moja ya Taasisi nufaika ya utekelezaji wa Programu ya BSAAT ambayo imejikita katika kutekeleza majukumu yanayohusiana na maboresho ya Mfumo wa Haki Jinai nchini hususan katika maboresho ya mifumo ya kisera na kisheria ambayo yana mchango mkubwa wa kuweka mazingira rafiki ya mapambano dhidi ya rushwa.

Mradi huu umeanza kutekelezwa kuanzia mwaka 2019/2020 na unatarajia kukamilika ifikapo mwaka 2024/2025. Vilevile, maandalizi ya programu hii awamu ya pili unaendelea ambapo utatekelezwa kwa kipindi cha miaka mitano baada ya awamu ya kwanza kukamilika.

Malengo ya mradi huu ni pamoja kuzijengea Taasisi za Haki Jinai uwezo wa kupambana na rushwa nchini kwa maendeleo endelevu ya Taifa.

Matokeo tarajiwa ya programu hii ni pamoja na kuweka mifumo imara ya kisera na kisheria katika mapambano dhidi ya rushwa kubwa nchi ambazo ni kikwazo cha maendeleo na kupambana na umaskini nchini na kuongeza wigo wa kushughulikia mashauri makubwa ya rushwa kwa wakati.

Mradi huu unatekelezwa na Wizara ya katiba na Sheria, Ofisi ya Mwanasheria Mkuu wa Serikali, Mahakama ya Tanzania na Ofisi ya Taifa ya Mashtaka.

1. Mahakama Kuu ya Tanzania www.judiciary.go.tz

2. Ofisi ya Mwanasheria Mkuu wa Serikali www.agctz.go.tz

3. Ofisi ya Wakili Mkuu wa Serikali www.osg.go.tz

4. Ofisi ya Taifa ya Mashtaka www.nps.go.tz

5. Tume ya Haki za Binadamu na Utawala Bora www.chragg.go.tz

6. Wakala wa Usajili, Ufilisi na Udhamini www.rita.go.tz

7. Tume ya Kurekebisha Sheria Tanzania www.lrct.go.tz

8. Tume ya Utumishi wa Mahakama www.jsc.go.tz

9. Taasisi ya Mafunzo ya Uanasheria kwa Vitendo www.lst.go.tz

10. Chuo cha Uongozi wa Mahakama www.ija.go.tz

Mradi huu unalenga kuimarisha matumizi ya TEHAMA katika Sekta ya Sheria na kuunganisha mifumo ya taasisi ya utoaji huduma za kisheria kwa njia za kielektroni ili kuongeza ufanisi, kuharakisha upatikanaji wa haki na kupunguza gharama za utoaji wa huduma hizo. Matokeo ya awali ya mradi huu ni kuwa na mifumo iliyoainishwa kwa ajili ya kutoa huduma kwa Taasisi za Haki Jinai nchini. Matokeo ya Kati ya Mradi huu ni kuona haki Jinai inapatikana kwa wakati nchini. Matokeo ya muda mrefu ni kuwa na Mfumo wa haki jinai unaochangia maendeleo endelevu ya nchi

Kampeni hii inafanyika kwa miaka mitatu kuanzia mwezi Machi, 2023 hadi mwezi Februari, 2026 katika mikoa yote ya Tanzania Bara na Zanzibar. 

Kampeni inajikita katika kutoa elimu ya kisheria kwa wananchi hususan katika masuala ya ukatili wa kijinsia, migogoro ya ardhi, mirathi, usuluhishi wa migogoro kwa njia mbadala, na masuala yahusuyo haki za binadamu kwa ujumla. Utekelezaji wa kampeni unafanyika kwa kushirikiana na Wizara na Taasisi za Serikali, Asasi za Kiraia, Wanazuoni na Wadau wa Maendeleo. 

Lengo kuu la Kampeni ni ni kulinda na kukuza upatikanaji wa haki kwa wote kupitia huduma ya msaada wa kisheria nchini.

Katika kufikia lengo hilo, kampeni inaongeza uelewa wa kisheria na haki za binadamu kwa jamii hususan haki za wanawake na watoto; Inatoa  huduma ya  ushauri  wa kisheria na unasihi kwa waathirika na manusura wa ukatili wa kijinsia; kuongeza uelewa kwa wananchi kuhusu  elimu ya sheria,  masuala ya  haki na wajibu na misingi ya utawala bora.

Matokeo ya muda mrefu ya kampeni hii ni kuchangia katika kuboresha upatikanaji wa haki kwa watu wasiojiweza, hususan wanawake, watoto na makundi mengine yaliyo katika mazingira hatarishi. Vilevile, itachangia kuimarisha amani na utulivu, kuongeza kipato cha mtu mmoja mmoja na  kuleta utengamano wa kisiasa hapa nchini.

Matokeo ya kati ni kuimarika kwa mfumo wa utoaji wa huduma ya msaada wa kisheria katika ngazi za Serikali Kuu hadi Serikali za Mitaa.

Matokeo ya muda mfupi ni kuongezeka kwa idadi ya watu wanaotoa taarifa za matukio ya ukatili dhidi ya wanawake na watoto; kupungua kwa idadi ya migogoro na matukio yanayotokana na ukosefu wa uelewa wa sheria; Kuimarika kwa uwajibikaji na uwezo wa taasisi za Serikali na zisizo za kiserikali zinazotoa huduma za msaada wa kisheria.

Kampeni imeanza kutekelezwa Jijini Dodoma tarehe 28 Mei, 2023 baada ya kuzinduliwa na Waziri Mkuu wa Jamhuri ya Muungano wa Tanzania Mhe. Kassim Majaliwa (Mb) tarehe 27 Mei, 2023 Jijini Dodoma. Ratiba ya utekelezaji wa Kampeni hiyo kwa mwaka 2023 katika Mikoa imezingatia usawa wa Kikanda kama ifuatavyo:-

Maeneo yanayofikiwa

Kwa utaratibu wa sasa, ratiba inalenga kufikia Kata kumi (10) kwa kila Halmashauri na Mitaa/Vijiji vitatu (3) kwa kila Kata. Kuna maeneo ambapo idadi ya Vijiji/Mitaa inapungua kutokana na mazingira nje ya uwezo wa watoa huduma.

1. Kushughulikia Masaula ya Kikatiba.

Katika mwaka wa bajeti wa 2023/24 Wizara ya Katiba na Sheria imejipanga kutoa elimu ya Katiba na Sheria kwa umma kupitia Vyombo mbalimbali vya Habari vikiwemo redio, luninga, mitandao ya kijamii na tovuti za Wizara pamoja na kugawa Katiba kwa wananchi. Mkakati huu unalenga kuhakikisha wananchi wanapata uelewa wa Katiba na kuwajengea uwezo wa kufahamu   haki na wajibu wao kwa taifa na kuwawezesha kushiriki katika mijadala ya Katiba.

2. Kusimamia Mfumo wa Haki na Utoaji Haki.

Katika mwaka wa Bajeti 2023/24 Wizara ya Katiba na Sheria imejipanga kuendelea kusimamia mifumo ya haki na utoaji haki ili kuhakikisha inapunguza mlundikano wa mashauri mahakamani na kuhakikisha wananchi wote wanapata haki sawa na kwa wakati.

3. Kuratibu Masuala ya Haki za Binadamu na Utoaji wa Huduma ya Msaada wa Kisheria

Mwaka wa fedha 2023/24 Wizara ya Katiba na Sheria imejipanga kuendelea kuratibu masuala ya Haki za binadamu ikiwemo kushiriki vikao mbalimbali vinavyohusu masuala ya haki za binadamu. Pia Wizara imejipanga kuendelea kutoa msaada wa kisheria kupitia Kampeni ya Mama Samia Legal Aid Campaign ambayo imepangwa kufanyika mikoa yote nchini Tanzania Bara na Zanzibar.

4. Kutunga Sera zinazohusu Masuala ya Kisheria na Kusimamia Utekelezaji wake

Katika mwaka wa bajeti ya 2023/24 Wizara ya Katiba na Sheria imejipanga kutunga sera na sheria mbalimbali kwa kushirikiana na wadau wa masauala ya sheria pamoja na Katiba ikiwa ni mkakati wa  kuimarisha  na  kuendeleza sekta ya sheria nchini.

5. Uandishi wa Sheria

Wizara ya Katiba na Sheria kupitia ofisi ya Mwanasheria Mkuu itaendelea  kuhakikisha kuwa sheria za nchi zinakwenda na wakati na zina akisi Sera na vipaumbele vya Serikali  katika Nyanja zote za kiuchumi, kisiasa, kijamii kiutamaduni, kimazingira pamoja na kiteknolojia.

6. Kuendesha Mashtaka ya Jinai. 

Katika bajeti ya mwaka wa fedha 2023/24 Wizara imejipanga kuendelea na kuendesha kesi mbalimbali za jinai kupitia ofisi ya  Taifa ya Mashtaka.

7. Kushughulikia Uendeshaji wa Mashauri ya Madai na Usuluhishi.

Katika Mwaka wa bajeti ya mwaka wa Fedha 2023/24 Wizara ya Katiba na Sheria kupitia Ofisi ya Wakili Mkuu wa Serikali imejipanga kuendesha mashauri mbalimbali ya kesi za madai pamoja na kesi zingine.

8. Usuluhishi wa Migoro ya Kibiashara, Sheria za Kimataifa na Mikataba.

Wizara ya Katiba na Sheria imejipanga kufanya mapitio ya Sheria mbalimbali za usuluhishi na kuandaa mapendekezo ya uboreshwaji wa Sheria hizo pamoja na kukusanya maoni ya kuhusu mapendekezo ya maboresho pamoja na kuandaa rasimu ya marekebisho ya sheria.

9. Kuratibu Usajili wa Matukio Muhimu ya Binadamu, Usimamizi wa Ufilisi na Udhamini.

Wizara kupitia Wakala wa Usajili, Ufilishi na Udhamini - RITA itaendelea kuimarisha shughuli za usajili wa matukio muhimu ya binadamu, ufilisi na udhamini  kwa ajili ya mipango ya maendeleo ya Taifa.